တိမ်မင်းသမီးရဲ့ဒဏ္ဍာရီကိုအကောင်းဆုံးဖြစ်ချင်တယ် ~ ကိုထွေး(နည်းပညာ)

“နဝရတ်တို့ဆိုင်က ဒီဇိုင်နာ မကာအိုမှာ သွားပြိုင်တာ ဒီဇိုင်နာ အယောက် နှစ်ဆယ်ထဲက နဝရတ်တို့ဆိုင်က ဒီဇိုင်နာက ဒုတိယဆု ရခဲ့တာ၊ အာရှနိုင်ငံ ပေါင်းစုံထဲမှာ ကိုယ်စားပြု သွားပြိုင်ခဲ့တာပေါ့။ သူညှပ်ခဲ့တဲ့ ဆံပင်ပုံလေးကို အမှတ်တရ ညှပ်ထားတာပါ။ အဓိကကတော့ စိတ်ပဲပေါ့။ နဝရတ် စိတ်ထဲမှာ လွတ်လွတ် လပ်လပ်လေး နေချင်တာရယ် တိမ်မင်းသမီး ဇာတ်ကားကြီး အတွက် လုံးပန်းခဲ့ရတာ အတွက်ကြောင့် လွတ်လပ်သွားအောင် အခုလို ဆံပင်ပုံလေးကို ညှပ်ဖြစ်ခဲ့တာလည်း ပါတာပေါ့” ဟု ဆံပင်ပုံစံအသစ် ဒီဇိုင်းအသစ်နဲ့ တွေ့နေရတဲ့ နဝရတ်၊ တိမ်မင်းသမီးရဲ့ ဒဏ္ဍာရီ ဇာတ်ကားကြီးနဲ့ နာမည်ကြီးနေတဲ့ နဝရတ်ကို ဒီတစ်ပတ်မှာတော့ 8 DAYS cover အဖြစ် ရွေးချယ်လိုက်ရပါတယ်

တိမ်မင်းသမီးရဲ့ ဒဏ္ဍာရီ ဇာတ်ကားကြီးကို ဘယ်နိုင်ငံတွေမှာ ပြသဖို့ အစီအစဉ် ရှိပါသလဲ။

ဆယ်လပိုင်းမှာ အမေရိကမှာ သွားပြဖို့ လုပ်ထားတယ်။ အန်တီ ဆွေဇင်ထိုက်ကနေ ဖိတ်စာနဲ့ လှမ်းခေါ်လိုက်မယ်တဲ့။ အိန္ဒိယမှာလည်း (၁၁)လပိုင်း ကျရင်တော့ သွားပြဖုိ့အတွက် ရုပ်ရှင် အစည်းအရုံးကနေ ဖိတ်စာ ပို့ထားတယ်။ နိုင်ငံခြားမှာ ပြသရမယ်ဆိုတော့ ဇာတ်ကား ရဲ့ Version နဲ့ Quality ကို ပြန်ထိန်းနေရတယ်။ ကိုယ့်မြန်မာပြည်မှာ အရင်ဆုံး မပြရဘဲနဲ့ သူများနိုင်ငံတွေမှာ ပြရမယ်ဆိုတော့ စိတ်ထဲမှာ နည်းနည်း feel ဖြစ်တယ်။ ဒါပေမဲ့ဇာတ်ကား မပြခင် ဒီမှာ အခွေတွေ ကြိုတင်ထွက်မှာကိုလည်း ကြောက်တယ်။

တိမ်မင်းသမီးအတွက် အခက်အခဲ မျိုးစုံ ကြုံတွေ့ နေရတယ်လို့ ကြားတယ်နော်။

ဇာတ်ကား တစ်ခုလုံးကို ကောင်းအောင် လုပ်ထားတယ်။ နိုင်ငံခြားမှာ ပြသရမှာဆိုတော့ အသံတွေကအစ ပြင်ဆင်ထားရတယ်။ ဖလင်အထိတော့ ပြောင်းလဲ ပြီးသွားပြီ။ အသံ recording ကျတော့ ဇာတ်ကားရိုက်တုန်းက လေသံတွေ အသံဖမ်းမိုက်ရဲ့ လိုအပ်ချက်တွေကို အစအဆုံး ပြန်ညှိနေရတယ်။ တော်တော် စိတ်ပျက်ဖို့ ကောင်းတယ်။ အသံဖမ်း အင်ဂျင်နီယာကို ပိုက်ဆံ သတ်သတ်ပေးပြီး ပြန်လုပ်ခိုင်းရတယ်။ သရုပ်ဆောင်တုန်းက mood ကို ဘယ်လိုမှ ပြန်မရတော့ဘူး။ ရုပ်ကြည့်ပြီး အသံ ပြန်ထပ်ရတာ ဆိုတော့လေ။ သရုပ်ဆောင်တွေ အကုန်လုံးလည်း ပြန်ပြီး အသံသွင်းရတော့ စိတ်တိုနေကြတယ်။ ဒါရိုက်တာပဲ အသံပိုင်း ဆိုင်ရာမှာ မှားသွင်းသလား၊ ဘယ်လိုလဲတော့ မသိဘူးလေ။ ဒါပေမဲ့ ဖြစ်တဲ့ ပြဿနာတော့ တော်တော်လေး များတယ်။ ဒါက မကျွမ်းကျင်ဘူးလို့ဘဲ ကိုယ်က သတ်မှတ်ရမှာပေါ့။

တိမ်မင်းသမီးကို နိုင်ငံခြားမှာ အရင်ဆုံး ပြသဖို့ထက် ကိုယ့်မြန်မာပြည်မှာ အရင်ဆုံး ပြသဖို့ စိတ်ကူး မရှိဘူးလား။

ဒီဇာတ်ကားက မြန်မာ့ရိုးရာကို အဓိကထားပြီး နယ်စုံ ရိုက်ထားတာ။ တစ်ကမ္ဘာလုံးကို မြန်မာပြည်ရဲ့ လှပတဲ့ ရှုခင်းတွေကို ပြသချင်တယ်။ ကျန်တာတွေတော့ သူတို့အတွက် မထူးဆန်းပါဘူး။ နိုင်ငံခြားမှာ ပြိုင်ပွဲဝင်ဖို့ အတွက် ရက်တောင် ချိတ်ပြီးသွားပြီ။ ဒါပေမဲ့ နဝရတ် စိတ်ထဲမှာ ပရိတ်အတွက် ခံစားချက်လေး တစ်ခု ဖြစ်လာတယ်။ ပရိသတ်ဆိုတာ ကိုယ့်ရဲ့ ထမင်းရှင်ပဲလေ။ ဘုရားဆွမ်းတော် တင်သလိုမျိုး ကိုယ့်ပရိသတ်ကိုလည်း ဦးဦးဖျားဖျား အနေနဲ့ ကိုယ့်ဇာတ်ကားကြီးကို ပြသချင်တဲ့ စိတ်လေး ပေါ်လာတယ်။ ဒီနှစ်ကုန်မှာ ပြသခဲ့ရင်တောင် နောင်နှစ်ထဲမှာ ပြသဖို့အတွက် သက်ဆိုင်ရာ လူကြီးတွေနဲ့ တိုင်ပင်ချင်တယ်။ အရင်ဆုံး မြန်မာပြည်မှာ ပြသဖို့ စဉ်းစားထားတယ်။ နိုင်ငံခြားဆိုတာ ပြိုင်ပွဲဝင်ဖို့ နောင်နှစ်ဆိုရင်လည်း ဖြစ်တာပဲ။

ဇာတ်ကားရိုက်တုန်းက အမှတ်တရလေးတွေ ပြောပြပေးပါဦး။

ဇာတ်ကား ကန်တော့ပွဲ ပေးကတည်းက စခဲ့တာပဲ။ ဒီဇာတ်ကား ရိုက်နေတုန်းမှာ ဒါရိုက်တာ အမေ ကွယ်လွန်တယ်။ ကင်မရာမင်းန် အဖေဆုံးတယ်။ နယ်သွားရိုက်တော့လည်း မြွေတွေ တွေ့ခဲ့ရတာလည်း အများကြီးပဲ။ ဒီဇာတ်ကားက တော်တော် ကြမ်းတယ်။ နယ်လည်း တော်တော် စုံခဲ့တယ်။ အဲဒီလို အခက်အခဲ မျိုးစုံကို ဇာတ်ကားကြီး ရုံတင် ပြသတဲ့အခါ လက်ကမ်း ကြော်ငြာ ဒါမှမဟုတ် စီဒီဖြစ်ဖြစ် ပရိသတ်တွေကို အမှတ်တရ ပေးမလား စဉ်းစားနေပါတယ်။

တိမ်မင်းသမီးနဲ့သာ အကယ်ဒမီ ရခဲ့မယ်ဆိုရင်ရော..။

တိမ်မင်းသမီးနဲ့ အကယ်ဒမီဆုသာ ရခဲ့ရင်တော့ အတိုင်းထက် အလွန်ပေါ့။ ဇာတ်ကားကြီးကို အကောင်းဆုံး လုပ်ထားတာ ဆိုတော့ နဝရတ်အတွက် စေတနာ မေတ္တာ တစ်ခုခုကို ရောင်ပြန်ဟပ်မှာပါ။ ပရိသတ်ဆီကပဲ ဖြစ်ဖြစ်ပေါ့။ ကိုယ်လွှတ်လိုက်တဲ့ မြှားက တစ်ခုခုတော့ ထိမှာပါ။ ကိုယ့်ရဲ့ စေတနာ မေတ္တာမြှားတစ်စင်း ဆိုတော့လေ။

အကယ်ဒမီ နဝရတ်လို့ ကြေညာပြီးတဲ့ နောက်မှာ ဘာတွေလုပ်ဖို့ ရှိပါလဲ။

အကယ်ဒမီသာ ရမယ် ဆိုရင်တော့ အကယ်ဒမီ ဧည့်ခံပွဲလေးကို အရင်ဆုံး လုပ်ရမှာပေါ့။ ရန်ကုန် ပြန်ရောက်မှသာ နဝရတ်ရဲ့ လက်ဦးဆရာ ဖြစ်တဲ့ ဦးကျော်ဟိန်းရှိရာ မှော်ဘီကို သွားတွေ့ရမှာပါ။ ဇာတ်ကား မပြခင်ကတည်းက သူ့ဆီကို အရင်ဆုံး ပြသဖို့ စဉ်းစားထားတယ်။

ဇာတ်ကား ရိုက်တဲ့အခါမှာ တော်တော်လေးကို စိတ်ရောလူရော မောပန်းခဲ့ရမှာပဲနော်။ တခြား ဇာတ်ကားတွေကို အနိုင်ပိုင်းလိုက်တဲ့ သဘောလား။

ဟုတ်တယ်။ ဇာတ်ကား ရိုက်ပြီးတော့ စိတ်ရော လူရော မောပြီး ကျန်ခဲ့တာ။ Quality ကို နည်းနည်း ထိန်းထားချင်တယ်။ ဇာတ်ကား တစ်ကားကို ရိုက်တဲ့အခါမှာ ဖြစ်ချင်ပြီဆိုရင် တကယ်စိတ်နှစ်ပြီး လုပ်လိုက်တာ၊ တခြား ဘာကိုမှ မကြည့်တော့ဘူး။ ဇာတ်ကားတွေ လာငှားတာတွေ ရှိပါတယ်။ နဝရတ်နဲ့ မလိုက်တာတွေ အဆင်မပြေတာတွေ ရှိတော့ အဲဒီလို ဇာတ်ကားမျိုးတွေ ရိုက်ရင် တိမ်မင်းသမီးကို သွားထိမှာပဲလေ။ နောက်မှပဲ နဝရတ်နဲ့ လိုက်မယ့် ကာရိုက်တာ ဇာတ်တွေကို မဖြစ်မနေ လာငှားကြမှာပဲ။ အဲဒီကျမှ ရိုက်ဖို့ စဉ်းစားထားတယ်။ ပရိသတ်က သတ်မှတ်ပေးထားတဲ့ နဝရတ်ဆိုတဲ့ နေရာတစ်ခုကို တန်ဖိုးရှိရှိလေးနဲ့ ရပ်တည်နေချင်တယ်။ အရမ်း ပေါ့ပျက်ပျက်ကြီး မဖြစ်သွားစေချင်တဲ့ သဘောပါပဲ။

တကယ်လို့များ နဝရတ်ကို အမေခန်းမှာ ခေါ်ရိုက်မယ်ဆိုရင် ရိုက်ဖြစ်မှာပါလား။

လွန်ခဲ့တဲ့ လေးငါးခြောက်နှစ် ကတည်းက အမေခန်းကို ရိုက်ကူးပါတယ်။ မြင့်မြတ်ရဲ့ အမေနေရာကလည်း သရုပ် ဆောင်ခဲ့ဖူးပါတယ်။ မြင့်မြတ်နဲ့ ရိုက်တဲ့ ဇာတ်ကားဆိုရင် အမေ ကာရိုက်တာကနေ သရုပ် ဆောင်ခဲ့ဖူးတာပေါ့။ နဝရတ်ကတော့ သရုပ်ဆောင်ပါတယ်။

အနုပညာ အလုပ်တွေ စီးပွားရေး အလုပ်တွေကို တစ်ယောက်တည်း လုပ်နေရတဲ့ နဝရတ်အတွက် မှီခိုအားထားရာ ဘဝလက်တွဲဖော် မရှာတော့ဘူးလား။

(ရယ်လျက်) ဒီတစ်သက်တော့ မရှာတော့ပါဘူး။ ဘာဖြစ်လို့လဲ ဆိုတော့ ကိုယ့်ရဲ့ အချိန်တွေကို ခွဲပြီး ပေးရတော့မှာလေ။ အာရုံတွေ အရမ်း နောက်လွန်းလို့။

မောင်တစ်ထမ်း၊ မယ်တစ်ရွက်ဆိုတဲ့ စကားလေးရော..။

အမယ်လေး..၊ မောင်ကပဲ မထမ်းဘဲနဲ့ မယ်ကပဲ ရွက်နေရရင် ဘယ်လိုလုပ်မလဲ။ နှစ်ယောက်စာ ရွက်နေရရင် ကိုယ်ချည်းပဲ ဒုက္ခ ရောက်နေပါ့မယ်။ မလုပ်ပါနဲ့ အေးဆေးပဲ နေပါရစေတော့။

ဒါဆိုရင် အကြိုက် မတွေ့ခဲ့လို့ပေါ့နော်။

စိတ်ကြိုက်တော့ တွေ့သား။ ကိုယ်တိုင်က အကြိုက်များလို့ ရွေးရ ခက်နေတာလေ။ (ရယ်လျက်)၊ အလကား စတာပါ။ နဝရတ် ပတ်ဝန်းကျင်က ပတ်သက်ရာ မိတ်ဆွေတွေ့ရဲ့ အိမ်ထောင်ရေး ဒုက္ခတွေကို တွေ့နေရတော့ အိမ်ထောင်ပြုရမှာ ကြောက်လာတယ်။ ဘယ်သူမဆို ဆေးပေးမီးယူဆိုတာ အသက်ကြီးရင်လည်း ရှာရင်ရပါတယ်။ နိုင်ငံခြားမှာဆိုရင် အသက်ကြီးမှ လက်ထပ်ကြတာ အများကြီးပဲ။ နှစ်ယောက်တည်းနဲ့ ပျော်စရာကြီး။ ဒါပေမဲ့ နဝရတ်က မမြင်နိုင်တဲ့ အရာကို မမျှော်မှန်းတတ်ဘူး။ လက်တွေ့ကျကျ မျက်စိရှေ့မှာ တွေ့ရတာကို ကျင့်သုံးရတာ အကြိုက်ဆုံးပါပဲ။ ဒါပေမဲ့ နဝရတ်ကတော့ အခုလက်ရှိ အခြေအနေလေးကို အကြိုက်ဆုံးပဲ။

ဒါဆိုရင် နဝရတ် နားလည်ထားတဲ့ ဘဝအဓိပ္ပါယ်က..။

ငြိမ်းချမ်းတဲ့ ဘဝလေးကို လိုချင်တယ်။ လှူမယ် တန်းမယ်။ အသက်ကြီးလာရင် ကလောလို နေရာလေးမှာ စိုက်ခင်းလေးနဲ့ ငြိမ်းချမ်းစွာ နေချင်တယ်။ အရမ်းချမ်းသာပြီး သားသမီး အပူတွေဆိုရင် အရမ်း စိတ်ညစ်တယ်။ အေးအေးချမ်းချမ်း life style လေး နေသွားချင်တယ်။ သီလရှင် ဝတ်ဖြစ်ရင်လည်း ဝတ်ဖြစ်မှာပေါ့။

အသက်ကြီးလာရင် သီလရှင် ဝတ်မယ်ဆိုတော့ နဝရတ်ရဲ့ ပိုင်ဆိုင်မှုတွေကရော..။

အကုန် လှူခဲ့မှာပေါ့၊ ကိုယ့်ကိုယ်ကိုယ်တောင် လှူခဲ့မှာ။ ဘာလုပ်တော့မှာလဲ။ တရားစခန်းတွေ ဘာတွေလည်း ဝင်ခဲ့တော့ အကုန်လုံး သိနေပြီလေ။ လောကကြီးက နေတတ်ရင် ကျေနပ်စရာကြီးပါ။

အခုဆိုရင် နဝရတ်ရဲ့ တိမ်မင်းသမီး ဒဏ္ဍာရီ ဇာတ်ကားနဲ့ ပတ်သက်ပြီး သိခွင့်ရခဲ့သလို နဝရတ်ရဲ့ စိတ်နေ သဘောထားကိုလည်း အနည်းငယ် သိခဲ့ရပါတယ်။ ဒါကြောင့် အင်တာဗျူးရဲ့ နှုတ်ဆက်စကားလေး ပြောပေးပါဦး။

နဝရတ်ရဲ့ 8 DAYS ပရိသတ်တွေ ခုနှစ်ရက် သားသမီး အားလုံးကို ပြောချင်တာက ပရိတ်အတွက် နဝရတ်ပါ။ နဝရတ်လုပ်တဲ့ အနုပညာ အားလုံးဟာ ပရိသတ် အတွက်ပါ။ ပရိသတ်ရင်ထဲ အနက်ရှိုင်းဆုံး နေရာထိ ရောက်အောင် လုပ်ဆောင်နေပါတယ်လို့ နှုတ်ဆက်ချင်ပါတယ်။

Ref: 8 Days